ئێوارەی رۆژی یەکشەم 2024/9/22، د.ئەحمەد ئەنوەر سەرۆکی دەستەی دەسپاکی هەرێمی کوردستان پێشوازی لە ستیڤن بیتنەر، كونسولی گشتيی ئەمریکا لە هەولێر و شاندێکی ياوه‌رى کرد.
شاندی کونسوڵخانەی ئەمریکا پێکهاتبوون لە، جریس ماسۆن، بەڕێوه‌بەری پرۆگرامی عێراق لە نووسینگەی نەهێشتنی تیرۆر لە وەزارەتی دەرەوەی ئەمه‌ریکا، تامی وایزەر، یاریدەدەری پاشکۆی یاسایی و زەهیب ڕەشید، بەرپرسی سیاسی له كونسولخانه‌ى ئه‌مه‌ريكا.
لە کۆبوونەوەکەدا، بەرێزان هاژە عومەر بەرێوەبەری نووسینگەی سەرۆکی دەستە و سەرخێڵ هاشم بەڕێوەبەری راگەیاندنی دەستە ئامادە بوون.
سەرەتا، د.ئەحمەد ئەنوەر سەرۆکی دەستەی دەسپاکی کورتەیەکی لەبارەی ستراتیجی رووبەڕووبوونەوەی گەندەڵی پێشکەش کرد کە مانگی رابردوو بە ئامادەبوونی مەسروور بارزانی سەرۆک وەزیرانی کوردستان یەکەم راپۆرتی ستراتیجەکە راگەیەنرا.
سەرۆکی دەستە ئاماژەی بۆ ئەوە کرد ستراتیجەکە رێڕەوێکی گرنگە بۆ بەرەنگاربوونەوەی گەندەڵی لە گشت سێکتەرەکاندا.
لە بەشێکی تری قسەکانیدا باسی لەوە کرد ئێستا ئامادەکارییان بۆ میساقی شەرەفی نێوان لایەنە سیاسییەکان کردووە بۆ ئەوەی پێش هەڵبژاردنەکان حزبەکان پابەندی ئەو میساقە بکەن و ناوەڕۆکەکەیشی ئەوەیە هەمووان بەرەنگاری گەندەڵی ببنەوە.
د.ئەحمەد ئەنوەر ئەزموونی کاری خۆی و روئیای بۆ بەرەنگاربوونەوەی گەندەڵی بۆ شاندی میوان خستەڕوو.
دووپاتی لەوە کردەوە کە گەندەڵی لە تیرۆر مەترسیدارترە، بۆیە وەک چۆن هاپەیمانان لە سەرووی هەموویانەوە ئەمریکا هاوکار بوو بۆ پێشمەرگە تا شەڕی داعش بکات، لە هەمانکاتدا پێویستە بۆ شەڕی گەندەڵیش هاوکار بن.
لای خۆیانەوە شاندی میوان سەرباری دووپات کردنەوەی مەترسیی گەندەڵی لە عێراق ئاماژەیان بەوە کرد، لە چوارچێوەی ستراتیج و بەرنامەکانی خۆیان هاوکار دەبن.
ستیڤن بیتنەر، كونسولی گشتيی ئەمریکا لە کۆبوونەوەکەدا ئاماژەی بەوە دا، پێویستە رۆڵی دەستەی دەسپاکی زیاتر بکرێ تا هەنگاوەکان بە ئاراستەی بەرەنگاری گەندەڵی تۆکمەتر بن.
هەروەها سەرسوڕمانی خۆی لە ژمارەی کەمی لێکۆڵەرەکانی دەستە پێشان دا کە لێکۆڵینەوە لە کەرتی گشتیی دا دەکەن.
لە کۆتایشدا، هەردوولا دووپاتیان لە هاوئاهەنگی و کاری پێکەوەی زیاتر کردەوە.
