د.ئەحمەد ئەنوەر سەرۆكی دەستەی دەسپاكی هەرێمی كوردستان لە بەغدا بەشداری لە كۆبوونەوەیەكی فراوانی نێوان دەزگاچاودێرییەكان بە هاوكاری یەكێتی ئەوروپا و بەرنامەی نەتەوە یەكگرتووەكان كرد بۆ پەرەپێدان دەستپێكردنی قۆناغی دووەمی پڕۆژەی “بەرەنگاربوونەوەی گەندەڵی”.
لە كۆبوونەوەكەدا، د.ئەحمەد ئەنوەر سەرۆكی دەستەی دەسپاكی كوردستان باسی لە گرنگیی گرتنەبەری ڕێوشوێنی خۆپارێزی بۆ وەستاندنی پێشێلكارییەكان كرد كە بەشدارن لەبەرزكردنەوەی ئاستی گەندەڵی.
هەروەها ئاماژەی بە هەوڵەكانی دەستەی دەسپاكی كوردستان كرد بۆ رێگری و كەمكردنەوەی ئاستی گەندەڵی و داوایكرد هاوئاهەنگی زیاتر لەنێوان دەزگا چاودێرییەكاندا هەبێت.
لە كۆبوونەوەكەدا د.مەزهەر جبووری جێگری سەرۆكی دەستەی دەستپاكی فیدراڵی ئامادەبوو رای گەیاند، كە بەرەنگاربوونەوەی گەندەڵی و بیابانبوون و پیسبوونی ژینگە بوونەتە “پرسگەلێكی گرنگ” كە ناتوانرێت وەك بابەتی پەراوێز مامەڵەی لەگەڵدا بكرێت.
جبوری ئاماژەی بەوەدا كە قۆناغی دووەمی پڕۆژەكە دەبێتە هۆی بەرزكردنەوەی توانای چاودێری و دادوەری لە كەیسەكانی پەیوەست بە سامانە سروشتییەكان.
لای خۆیەوە مایا تورابی، بەڕێوەبەری پڕۆژەی پشتیوانی دەستپێشخەرییەكانی دادپەروەری بەرنامەی نەتەوە یەكگرتووەكان بۆ پەرەپێدان، پێداچوونەوەی بەو پێشكەوتنە بەرچاوانە كرد كە لە قۆناغی یەكەمی پڕۆژەكەدا بەدەست هاتوون لە بەرانبەر ئامانجەكانی كە بریتین لە بەرەوپێشبردنی یەكپارچەیی و كەمكردنەوەی گەندەڵی.
