رۆژانی 25 و 26ی 11، دەستەی دەسپاكی هەرێمی كوردستان بە هەماهەنگی لەگەڵ رێكخراوی یوئێن دی پی و وەزارەتی رۆشنبیری و لاوان و فەرمانگەی میدیا و زانیاری دوو رۆژ گفتوگۆی لەبارەی “رەشنووسی رەفتاری رۆژنامەوان و میدیا لە هەرێمی كوردستان بەڕێوە برد”.
رەشنووسەكە تایبەتە بە میدیاكانی كوردستان و رێكخستنەوەی كارەكانیان لە سەر بنەمای شەفافییەت و كولتوورسازی و كۆمەڵایەتی كە ببنە بەشێك لە رووبەڕووبوونەوەی گەندەڵی لە كوردستاندا.
لە رۆژی یەكەمی چالاكییەكەدا، هەریەكە لە د.ئەحمەد ئەنوەر سەرۆكی دەستەی دەسپاكی و حەمەی حەمەسەعید وەزیری رۆشنبیری و لاوان و د.جووتیار عادل سەرۆكی فەرمانگەی میدیا و زانیاری و ئازاد حەمەئەمین نەقیبی سەندیكای رۆژنامەنووسانی كوردستان ئامادەی بوون.
هاوكات بەڕێوەبەرانی گشتیی لەوەزارەتی رۆشنبیری و دەستەی دەسپاكی بۆ ماوەی دوو ڕۆژ لەگەڵ نوێنەری دەزگاكانی راگەیاندن لە گفتوگۆدابوون.
لە رێورەسمەكەدا، سەرخێڵ هاشم بەڕێوەبەری راگەیاندنی دەستەی دەسپاكی بەناوی دەستەكەیانەوە سوپاسی ئامادەبووانی كرد هەروەها تیشكی خستە سەر ئەوەی كە بیركردنەوەی د.ئەحمەد ئەنوەر سەرۆكی دەستەی دەسپاكی بۆ كاری راگەیاندن جیاوازە و دەستەكەیان هیچ جیاوازییەكی لەنێوان دەزگاكانی راگەیاندندا نەكردووە.
د.ئەحمەد ئەنوەر سەرۆكی دەستەی دەسپاكی هەرێمی كوردستان لە وتارێكدا دووپاتی لەوە كردەوە كە ئەو رەشنووسە بەشێكە لە ستراتیجی رووبەڕووبوونەوەی گەندەڵی كە لەلایەن ئەنجوومەنی وەزیرانی كوردستان پەسەند كراوە و لەرابردوودایش كار لەسەر هەموو سێكتەرەكان كراوە.
سەرۆكی دەستەی دەسپاكی بەپێویستی زانی میدیاكان رۆڵی زیاتر ببینن لە شەفافییەت و بەرەنگاربوونەوەی گەندەڵی هەروەك دوای كرد رەشنووسەكە لەگەڵ دەزگاكاندا تاوتوێ بكرێت و هەمووان پێوەی پابەند بن.
دواتر دەرگای گفتوگۆ بۆ راهێنەر سەلام عومەر كرایەوە تا لەگەڵ نوێنەری دەزگاكانی راگەیاندن لەماوەی دوو ڕۆژدا گفتوگۆ لەسەر رەشنووسەكە بكرێت.
