ڕاگەیاندنی ڕۆژنامەوانی

ڕۆژی چوارشەممە 29/9/2021 ئەنجومەنی وەزیرانی هەرێمی کوردستان بە سوپاسەوە و لەسەر پێشنیاری دەستەی دەسپاکی هەرێمی کوردستان پڕۆژەی (ستراتیژی نیشتیمانی ڕووبەڕووبوونەوەی گەندەڵی لە هەرێمی کوردستان-عێراق 2021-2025) کەوا لەلایەن دەستەی دەسپاکییەوە ئامادەکرابوو پەسەند کرد، کەوا پلانێکی گشتگیری دامەزراوەکانی هەرێمی کوردستانە لە پێناوی ئەوەی حوکمڕانیەت بە شێوەیەکی کاراتر، شەفافتر بۆ خزمەتی بەرژەوەندیی گشتی بەڕێوەبچێت.
سێکتەرەکانی ناو ئەم ستراتیژە لەسەر بنەمای هەر چوار پێوەری میتۆدی شیکاریی سوات SWOT Analysis واتە کورتکراوەی خاڵە بەهێزەکان Strengths، خاڵە لاوازەکان Weaknesses، دەرفەتەکان Opportunities و هەڕەشەکان Threats هەڵسەنگاندنیان بۆ کراوە و دواتر لە سەر ئەو بنەمایانە ئامانجەکان نووسراونەتەوە و پاشان ڕاستەوخۆ لە دوای هەر سێکتەر و بوارێک بەرنامەی جێبەجێکردن Action Plan خراوەتەڕوو. داتاکانی ناو ئەو ستراتیژە لە (ستراتیژی ڕووبەڕووبوونەوەی گەندەڵی لە هەرێمی کوردستان لە ساڵی 2017 تا 2021) وەرگیراون کە داتای جۆرایەتین Qualitative Data و بە شێوەی دیمانە و فۆکەس گروپ لەگەل دامەزراوە جۆراوجۆرەکان کۆکراونەتەوە.
و ئەم ستراتیژە بەسەر سێ سێکتەر و پاشکۆیەک دابەش بووە:
لە سێکتەری یەکەم دامەزراوە فەرمییەکان هەڵسەنگاندنیان بۆ کراوە کە بریتین لە پەرلەمانی کوردستان، دەسەڵاتی جێبەجێکردن کە سەرۆکایەتیی هەرێم و حکومەتی هەرێمی کوردستان لەخۆیدەگرێ. پاشان دەسەڵاتی دادوەری و دامەزراوە سەربەخۆکان کە دیوانی چاودێریی دارایی، دەستەی دەسپاکی، دەستەی مافی مرۆڤ و کۆمیسیۆنی باڵای سەربەخۆی هەڵبژاردن و ڕاپرسی لەخۆدەگرێت.
دواتر سێکتەری دووەم تایبەت کراوە بە پارتە سیاسییەکان و کۆمەڵگەی مەدەنی کە پارتە سیاسییەکان، کۆمەڵگەی مەدەنی و میدیا لەخۆدەگرێ.و و سێکتەری سێیەم تایبەت کراوە بە کەرتی تایبەت.
لە کۆتایی ستراتیژەکەدا پاشکۆیەک بۆ میکانیزمی چاودێریکردن و بەدواداچوونی جێبەجێکردن و هەڵسەنگاندنی ستراتیژەکە تەرخان کراوە.
جێگەی ئاماژەپێکردنە، ئەم ستراتیژە بۆ ئەم ئامانجانەی خوارەوە نووسراوەتەوە:
یەکەم: گەشەپێدانی دەسپاکی و لێپرسینەوە و شەفافیەت لە دامودەزگا گشتی و تایبەتییەکان لە هەرێمی کوردستان و بەرزکردنەوەی متمانەی هاوڵاتییان پێیان.
دووەم: برەودان بە کلتوور و هۆشیاریی ڕووبەڕووبوونەوەی گەندەڵی لە سەر ئاستی پەروەردەیی و دامودەزگایی.
سێیەم: جێگیرکردنی ستانداردە نێودەوڵەتییەکانی حوکمڕانێتیی شەفاف و ڕووبەڕووبوونەوەی گەندەڵی لە چوارچێوەیی یاسایی و جێبەجێکردن و دادوەریدا.
چوارەم: دروستکردنی هاوپەیمانێتیی بەرەنگاربوونەوەی گەندەڵی لە نێوان دامەزراوە جۆراوجۆرەکان بە مەبەستی چاودێریکردنی ئەدای دامودەزگاکان و پاڵپشتیکردن لە جێبەجێکردنی ئەم ستراتیژە.
پێنجەم: خێراکردنی پرۆسەکانی لێپرسینەوە و یەکلاکردنەوەی کەیسەکانی گەندەڵی لە ڕێی کارایی دامودەزگاکانی دادوەری و نەهێشتنی پارێزبەندیی یاسایی و سیاسیی ناپێویست.