ئەمڕۆ (١٧ی تشرینی یەکەم) سەرپەرشتیاری ئیدارەی گەرمیان پێشوازیکرد لە سەرۆکی دەستەی دەسپاکی هەرێم و شاندی یاوەری، و جەخت لە هەماهەنگی نێوان هەردولا کرایەوە.
لەسەردانەکەیدا بۆ گەرمیان، سەرۆکی دەستەی دەسپاکی لەگەڵ سەرپەرشتیاری ئیدارەی گەرمیان و جێگری سەرپەرشتیار و قایمقامی کەلار و کفری و بەڕێوەبەرە گشتیەکان کۆبوەوە.
لە سەرەتای کۆبونەوەکەدا، جەلال نوری سەرپەرشتیاری ئیدارەی گەرمیان، باسی لە ئیدارەی گەرمیان و یەکە ئیداریەکانی سنورەکە و بەڕێوەبەرایەتیەکان کرد و ئەوەی خستەڕوو گەرمیان ئیدارەیەکی سەربەخۆیەو حکومەتی هەرێم وەک پارێزگا مامەڵەی لەگەڵدا دەکات.
ووتیشی، ئێمە لە ئیدارەی گەرمیان لە رابردوودا پەیوەندی باشمان لەگەڵ دەستەی دەسپاکی هەبووە و ئێستاش جەخت لە پتەوکردنی زیاتری پەیوەندییەکان دەکەینەوە لەپێناو بەدیهاتنی شەفافیەت هاوکاری تەواوی دەستەکەتان دەبین بۆ راییکردنی کارەکانتان لە گەرمیان.
دواتر، د.ئەحمەد ئەنوەر سەرۆکی دەستەی دەسپاکی هەرێم باسی لە ووردەکاری کاروباری دەستەکەیان کرد و ئەوەی خستەڕوو، دەستەکەیان دەستەیەکی هاوکار و هەماهەنگە لەگەڵ دامودەزگاکانی حکومەتی هەرێم و ئەرکی چاودێریکردنی دەزگاکانی لە ئەستۆیە و لەو چوارچێوەیەشدا لەماوەی چەند ساڵی رابردوودا کاری باشی کردووە بۆ خزمەتی گشتی.
ووتیشی، بە نسبەت ئێمەوە گەرمیان ناوچەیەکی گرنگە و ئەمڕۆ هاتوین تا لە نزیکەوە چاومان بە ئێوە بکەوێت بۆ لێکتێگەیشتنی زیاتر و هەماهەنگی نێوان هەردولا.
سەرۆکی دەستە ئەوەشی دوپاتکردەوە، لە رابردوودا دامودەزگاکانی گەرمیان هاوکارێکی باشی دەستەکەیان بووە بۆ راییکردنی کارەکانیان، جەختی لە گرنگی ئەو هاوکاری و هەماهەنگییەی نێوان هەردولاش کردەوە.
دواتر هەریەکە لە جێگری سەرپەرشتیاری ئیدارەی گەرمیان و قایمقامی کەلار و قایمقامی کفری و بەڕێوەبەرە گشتیەکان، سەرنج و تێبینی خۆیان لەسەر پرسی بەدواداچونەکانی دەستە خستەڕوو و ئامادەییان پیشاندا بۆ هاوکاریکردن و هەماهەنگی لەگەڵ دەستەی دەسپاکی بۆ راییکردنی کارەکانیان.
