رۆژی هەینی 2023/12/8 بە بۆنەی رۆژی جیهانی بەرەنگاربوونەوەی گەندەڵی، ماراسۆنێكی هاوبەش لەنێوان دەستەی دەسپاكی هەرێمی كوردستان و وەزارەتی پەروەردە بە هەماهەنگی رێكخراوی undp ئەنجام درا.
چالاكییەكە لەپاڕكی سامی عەبدولرەحمان لە هەولێر بە ئامادەبوونی، رێبەر ئەحمەد وەزیری ناوخۆی حكوومەتی هەرێمی كوردستان و د.ئەحمەد ئەنوەر سەرۆكی دەستەی دەسپاكی هەرێمی كوردستان و رەگەز رەشید نوێنەری وەزیری پەروەردە و چەندان بەڕێوەبەری گشتیی و قوتابیانی پەروەردەكانی هەولێر بەڕێوەچوو.
ماراسۆنەكە بە دروشمی “پەیامەكەت بگەیەنە” ئامانج لێی نەهێشتنی گەندەڵی و گەیاندنی پەیامی دژایەتی گەندەڵی بوو.
لە رێوڕەسمەكەدا، د.ئەحمەد ئەنوەر سەرۆكی دەستەی دەسپاكی هەرێمی كوردستان وتارێكی پێشكەش كرد و رای گەیاند، بەرەنگاربوونەوەی گەندەڵی ئەركی نیشتمانی هەموو لایەكە و گەندەڵی هیچی لە تیرۆر كەمتر نییە و گەشەپێدان رادەگرێت و ئابووری وڵات بەرەو داڕمان دەبات.
سەرۆكی دەستەی دەسپاكی گوتی، هەرێمی كوردستان لە روانگەی هەستكردن بە گەندەڵی یاسای دەستەی دەسپاكی دەركرد و دەستەكە دامەزرا و سەرباری ئەو كێشانەی لەناوچەكەدا هەبوون، بەڵام هەنگاوەكانمان بۆ دامەزراندنی دەستە بەردەوام بوو بە كەمترین كارمەند دەستمان بە كاركردن كرد.
د.ئەحمەد ئەنوەر ئاماژەی بۆ ئەوەش كرد كە هەنگاوی زۆرمان ناوە، لە پڕكردنەوەی فۆڕمی سەروەت و سامان و رێنوێنی وەزیفی و چەندان هەنگاوی ترمان ناوە تەنانەت چەندان سەرپێچی لە وەزیفەی گشتیی تۆمار كراون.
سەرۆكی دەستەی دەسپاكی گوتی، بەدواداچوون لەسەر جێبەجێكردنی یاسای چاكسازی كراوە و دامەزراوەكانیشمان ئاگادار كردووەتەوە تا چارەسەر بكرێن، هەروەها لە بواری لێكۆڵینەوە سەتان كەیسی گەندەڵی رەوانەی دادگا كراون، كە پێش دامەزراندنی دەستەی دەسپاكی كەیسی گەندەڵی زۆر بە كەمی دەچووە دادگا.
هەروەها روونیی كردەوە كە ستراتیجی رووبەڕووبوونەوەی گەندەڵی ئێستا كەوتووەتە بواری جێبەجێكردن و وەك بەشێكی سەرەكی مامەڵەی لەگەڵ دەكرێ.
دووپاتیشی كردەوە كە چاكسازی بنەمایەكی گرنگە و رۆڵی حكوومەت و دامەزراوەكان و خزمەتگوزارییە گشتییەكان زیاتر دەكات.
هەروەك بە پێویستی زانی یاسای دەستەی دەسپاكی خولی داهاتووی پەرلەمان هەموار بكرێتەوە و دادگایەكی تایبەت بۆ كەیسەكانی گەندەڵی دابمەزرێت.
هەروەها رەگەز رەشید وتاری وەزارەتی پەروەردەی حكوومەتی هەرێمی كوردستانی خوێندەوە و ئاماژەی بە گرنگی ئەو چالاكییە كرد و خۆشحاڵی خۆی بە هاوئاهەنگی نێوان دامەزراوەكان بۆ رووبەڕووبوونەوەی گەندەڵی پێشاندا.
هەر لەو رێوڕەسمەدا ئاوكی لۆتسما نوێنەری رێكخراویUNDP كە بە هەمان شێوە لە ماڕاسۆنەكەدا بەشدار بوو گوتی، خۆشحاڵە كە دەستەی دەسپاكی هەرێمی كوردستان بە گرنگییەوە یادی رۆژی جیهانی رووبەڕووبوونەوەی گەندەڵی دەكاتەوە و چالاكی جۆراوجۆری هەیە.
