رۆژی سێشەم 2/8/2022، سەرۆكی دەستەی دەسپاكی لە هەرێمی كوردستان رایگەیاند، لە ماوەی پێنج ساڵی رابردوودا، 72 بەرپرسی پلە باڵا، لەسەر دۆسیەكانی گەندەڵی لێكۆڵینەوەیان لەگەڵدا كراوە، لە شەش مانگی رابردووشدا 799 دۆسیە لە دەستەكەیان تۆماركراوە و لێكۆڵینەوەیان تێدا دەكرێت.
د.ئەحمەد ئەنوەر، سەرۆكی دەستەی دەسپاكی لە هەرێمی كوردستان، لە كۆنفرانسێكی رۆژنامەوانیدا گوتی “لە ساڵانی 2017 بۆ 2022 دا لەلایەن دادوەرانی لێكۆڵینەوەی دەسپاكییەوە، وەك تۆمەتبار لێكۆڵینەوەی لە دۆسیەكانی 72 بەرپرسی پلە باڵا و پلە تایبەت كراوە، كە پێكهاتوون لە شەش وەزیر، یەك سەرۆكی دەستە، شەش بریكاری وەزیر، یەك پەرلەمانتار، پێنج راوێژكار، 34 بەڕێوەبەری گشتی، یەك پارێزگار، پێنج قایمقام، چوار سەرۆكی فەرمانگە و هەشت ئەندامی ئەنجوومەن”.
بەگوێرەی ئەو ئامارانەی سەرۆكی دەستەی دەسپاكی خستییەڕوو، لە ماوەی شەش مانگی رابردوودا، 799 دۆسیە لە دەستەكەیان تۆماركراون، هەروەها 138 دۆسیە لە دەستەكەیانەوە رەوانەی دادگاكان كراون، هەر لەمساڵیشدا 40 دۆسیەی دەستەی دەسپاكی، لە دادگاكان بڕیاریان لەسەر دراوە.
بە بڕوای د.ئەحمەد ئەنوەر، بەشێك لەو سزایانەی لەسەر دۆسییەكانی گەندەڵی لە دادگاكان دەركراون، سزای سوكن و بە پێویستی دەزانێت، سزاكان توندتر بن، بۆ بەرزكردنەوەی ئاستی رووبەڕووبوونەوەی گەندەڵی.
هەر لە كۆنفرانسە رۆژنامەنووسیەكەیدا، سەرۆكی دەستەی دەسپاكی باسی لەوەكرد، “زیاتر لە چوار ساڵە داوای تەرخانكردنی دادگایەك دەكەین، بۆ دۆسییەكانی گەندەڵی و جیاكردنەوەیان لە دۆسییەكانی دیكە، بڕیاریشدراوە لەسەر ئاستی سەرۆكایەتی دادگاكانی تێهەڵچوونەوە، دادگا دیاریبكرێت بۆ لێكۆڵینەوە لەسەر دۆسیەكانی گەندەڵی.
سەرۆكی دەستەی دەستپاكی گوتی: “ساڵی رابردوو ئەنجومەنی دادوەری بڕیاریدا داگایەكی تایبەت بە كەیسی گەندەڵی بكرێتەوە، ئەمساڵ بە نووسراوی فەرمی داوامان لێكردن بڕیارەكە بچێتە بواری جێبەجێكردنەوە، بەڵام بەداخەوە ئەوان بڕیارەكەیان هەڵوەشاندەوە، بڕیارێكی دیكەیان داوە ئەگەر ئەویش جێبەجێ بكرێت باشە، بڕیارەكە ئەوەیە لە هەر سەرۆكایەتییەكی دادگای تێهەڵچوونەوەی پارێزگا و ئیدارە سەربەخۆكان دادگایەكی تەرخان بكرێت، ئێمە چاوەڕێی جێبەجێكردنی ئەو بڕیارەین”.
گوتیشی: “ساڵانە 100 تا 150 كەیسی گەندەڵی رەوانەی دادگاكان دەكەین، پێشبینی دەكەین بۆ ئەمساڵ زیاتر لە 200 كەیسی گەندەڵی رەوانەی دادگاكان بكرێت”.
لەمیانەی پرسیارێكی رۆژنامەنووساندا لەبارەی لێكۆڵینەوە لە زیادبوونی سەروەت و سامانی بەرێوەبەری لێكۆڵینەوەی هەولێر بە شێوەیەکی بەرچاو سەرۆكی دەستەكە گوتی، بەڵێ، لیژنەیەك پێكهاتووە لە لێكۆڵینەوە و ئێستە كارەكانی تەواو نەكراوە، ئەو فۆڕمی سەروەت و سامانە هەموو ساڵێك بەسەر كارمەندانی دەستەكەدا دابەش دەكرێن لەكاتێكدا بۆ دامەزراوەكانی تر چوار ساڵ جارێكە.
دووپاتی كردەوە كە هیچ كەسێك بێ بەری نییە لە لێكۆڵینەوەكانی دەسپاكی و سكاڵا لەسەر هەركەسێك هەبێت لێكۆڵینەوەی لەگەڵ دەكرێ.
