لا چوارچێوەی ستراتیژی نیشتمانی ڕووبەڕووبوونەوەی گەندەڵی لە هەرێمی کوردستان دەستەی دەسپاکی بە هەماهەنگی لەگەڵ ڕێکخراوی undp و پاڵپشتی یەکێتی ئەوروپا کۆبوونەوەیەکی تایبەتیان لەگەڵ نوێنەری قونسڵخانەکانی هەرێمی کوردستان ئەنجام دا.
رۆژی چوارشەممە ٢٢/٦/٢٠٢٢ لە شاری هەولێر بە ئامادەبوونی دکتۆر احمد انور سەرۆکی دەستەی دەسپاکی لە هەرێمی کوردستان و نوێنەری ڕێکخراوی undp کۆبوونەوەیەکی تایبەت بە ئاشنابوون بە ستراتیژی نیشتمانی بۆ ڕووبەڕووبوونەوەی گەندەڵی لەگەڵ نوێنەری قونسلخانەی وڵاتان لە هەرێمی کوردستان ئەنجام درا.
سەرەتا د.احمد انور سەرۆکی دەستەی دەسپاکی لە هەرێمی کوردستان وتەیەکی پێشکەش کرد و تیایدا گرنگی داڕشتنی ستراتیژی ڕووبەڕووبوونەوەی گەندەڵی خستە ڕوو، هەروەها داوای لە نوێنەرانی قونسڵخانەکان کرد کە هەماهەنگی دەستەی دەسپاکی بکەن بۆ پرۆژەکانی بەرەنگاربوونەوەی گەندەڵی.
دواتر بەڕێز یاما نوێنەری ڕێکخراوی undp باسی لە هەماهەنگی ڕێکخراوەکەیان و یەکێتی ئەوروپا بۆ پاڵپشتی ستراتیژیەکانی عێراق و هەرێمی کوردستان کرد.
لە پاشان لە لایەن د.عدنان عبداللە بەڕێوەبەری فەرمانگەی خۆپاراستن و شەفافیەت پرزنتیشنێکی لە بارەی ڕۆلی دەستە لە داڕشتنی ستراتیژیەکە خستە ڕوو هەروەک داوای لە نوێنەری قونسلخانەکان کرد کە هەماهەنگی و پاڵپشتی بەردەوامی دەستەی دەسپاکی بکەن بە گوێرەی ئەو پرۆپۆزەڵە دیاریکراوانەی کە دەستەی دەسپاکی بۆ ئاسانکاری لە پرۆژەی بەرەنگاربوونەوەی گەندەڵی ئامادەی کردوە.
