د.ئەحمەد ئەنوەر: 976 كەیسی گەندەڵی لێكۆڵینەوەی تێدا دەكرێ
رۆژی پێنجشەم 2022/12/8 د. ئەحمەد ئەنوەر سەرۆكی دەستەی دەسپاكی هەرێمی كوردستان، كۆنگرەیەكی رۆژنامەوانی ئەنجامدا و تێیدا ئاماری كەیسەكانی گەندەڵی لە هەرێمی كوردستان خستە ڕوو.
لە سەرەتای كۆنگرە رۆژنامەوانییەكەدا، د.ئەحمەد ئەنوەر گوتی، رۆڵی دەزگا چاودێرییەكان رۆڵێكی گرنگە بۆ پڕۆسەی حوكومڕانی و پاڵنەرێكی گەورەیە، كە رۆژ بەرۆژ ئەركی دەزگا چاودێرییەكان قورستر دەبێت و پێویستە سێ سەرۆكایەتییەكە زیاتر پاڵپشتی بن.
روونیشی كردەوە، كە داوا دەكەین پەرلەمانی كوردستان لە هەمواری یاسای دەسپاكی هاوكارمان بێت و دەسەڵاتی دادوەری جارێكی تر بڕیارلە تهرخانكردنى دادگایهك بۆ كهیسهكانى گهندهلى بداتەوە، چونكە ئێستا سكاڵا و كەیسەكان زیاتر بووە و لەگەڵ ئەوەیشدا پێویستمان بە ژمارەی زیاتری لێكۆڵەرەكان دەبێت.
سەرۆكی دەستەی دەسپاكی هەرێمی كوردستان ئاماژەی بۆ ئەوە كرد كە رەوانەكردنەوەی كەیسەكانی گەندەڵی لە دادگا و پڕۆسەی جێبەجێكردنی دادگاییەكە پێوەندی بە دادوەرانی دەسپاكییەوە هەیە و پێوەندی بە دەستەی دەسپاكییەوە نییە و سەرجەمیان كاری دادوەرەكانە.
د.ئەحمەد ئەنوەر لە بەشێكی تری قسەكانیدا سەرنجی خستە سەر، ستراتیجی رووبەڕووبوونەوەی گەندەڵی لە هەرێمی كوردستان كە ئێستا گفتوگۆ لەگەڵ زۆرێك لە سێكتەرەكان كراوە و ئێستا فەرهەنگ و چەمكەكانی دەسپاكی لە پرۆگرامی خوێندن و چەندان توێژینەوەی زانستی بەرێوە دەچێت كە ئەوانە پڕۆژەی گرنگن و تا سەرەتای مانگی شوبات راپۆرتێك لەبارەی ستراتیجەكە ئامادە دەكرێ.
لەبارەی گەڕانەوەی فۆڕمی بەرژەوەندییە داراییەكان، سەرۆكی دەستەی دەسپاكی گوتی، ئەمساڵ هەزار و 838 فۆڕم لە خولی یەكەم گەڕاوەتەوە و ئەوە پڕۆسەیەكی بەردەوامە.
هەروەها گوتی، ئەمساڵ 77 كەیس لە دادگاكاندا یەكلا كراوەتەوە و فەرمانگەی كاروباری یاسای ئێستا سەرقاڵی ئامادەكردنی راپۆرتن بۆ جێبەجێكردنی یاسای چاكسازی.
لەبارەی ئاماری زیاتری كەیسەكانی گەندەڵی، د. ئەحمەد ئەنوەر سەرۆكی دەستەی دەسپاكی گوتی، ژمارەیەكی زۆری كەیسەكانی گەندەڵی تۆمار كراون 487 كەیسی نوێ تۆمار كراوە و 226 كەیسی هەواڵدەریش هەبووە كە هەمووی دەكاتە 713 كەیس و ژمارەیەكی زۆرە بەراورد بە ساڵانی رابردوو، كە بەهۆی ساڵانی رابردوو 976 كەیس لێكۆڵینەوەی تێدا دەكرێ.
دواتر سەرۆكی دەستەی دەسپاكی هەرێمی كوردستان وەڵامی رۆژنامەنووسانی دایەوە و بەزمانی عەرەبیش بۆ میدیا عەرەبییەكان ئامارەكەی خستە ڕوو.
