ئەمڕۆ یەكشەم 19/6/2022، پرۆتۆكۆڵی كاری پێكەوەیی لەنێوان دەستەی دەسپاكی هەرێمی كوردستان و رێكخراوی UNDP واژوو كرا.
پرۆتۆكۆڵەكە لەنێوان، د. ئەحمەد ئەنوەر سەرۆكی دەستەی دەسپاكی و زینە عەلی واژوو كرا كە بەشێكی سەرەكی پێوەندی بە پەرەپێدانی تواناكان بۆ بەرەنگاربوونەوەی گەندەڵی هەیە.
دوای واژووكردنەكە، د.ئەحمەد ئەنوەر سەرۆكی دەستەی دەسپاكی هەرێمی كوردستان لە كۆنگرەیەكی رۆژنامەوانی گوتی، پرسی چاكسازی و رووبەڕووبوونەوەی گەندەڵی پێوەندی بە خۆمانەوە هەیە و پێویستە خۆمان رووبەڕووی ببینەوە، لەپاڵ ئەو هاوكاریانەی كە لەلایەن رێكخراوەكانی دەرەوە بۆمان دەكرێت.
هەروەك دووپاتی لەوە كردەوە كە گەندەڵی پرسێكی فرەچەشنە و پێویستی بەڕووبەڕووبوونەوەی جدی هەیە.
زینە عەلی نوێنەری جێنشینی بەرنامەكانی UNDP لە كۆنگرە رۆژنامەوانیەكەدا رای گەیاند، كە سێكتەرەكان رۆڵی گرنگیان هەیە لە رووبەڕووبوونەوەی گەندەڵی و ئەوە بەرنامەی نەتەوە یەكگرتووەكانیش وایە كە گرنگی بە تواناكان دەدات بۆ بەرەنگاربوونەوەی گەندەڵی.
هاوكات سوپاسی دەستەی دەسپاكی هەرێمی كوردستانی كرد كە لەماوەی رابردوو پڕۆژەی گرنگیان بۆ بەرزكردنەوەی ئاستی شەفافییەت و رووبەڕووبوونەوەی گەندەڵی ئەنجام داوە.
