رۆژی چوارشەم 23/11/2022، بەڕێز د.ئەحمەد ئەنوەر سەرۆكی دەستەی دەسپاكی هەرێمی كوردستان بە ئامادەبوونی بەڕێزان د.عەدنان عەبدوڵا بەرێوەبەری گشتیی فەرمانگەی خۆپاراستن و شەفافییەت و هاژە عومەر بەرێوەبەری نووسینگەی سەرۆكی دەستە و خاتوو سەوسەن ئەمین بەرێوەبەری ئەکادیمیای دەسپاکی و چەند بەرپرسێكی بەش لە دەستەكەدا، پێشوازیان لە شاندێكی ئاژانسی ئەڵمانی بۆ هاریكاری نێودەوڵەتی و شەفافییەتی نێودەوڵەتی كرد.
شاندەكە پێكهاتبوون لە، سۆزان پەتۆ و ئۆلیڤەر عەسكەر و موعاز ئەبودەلۆ لە شەفافییەتی نێودەوڵەتی.
لە كۆبوونەوەكەدا، د.ئەحمەد ئەنوەر سەرۆكی دەستەی دەسپاكی هەرێمی كوردستان، كورتەیەكی لەبارەی كاروبارەكانی دەستەی دەسپاكی پێشكەش كرد و ئاماژەی بە ستراتیجی رووبەرووبوونەوەی گەندەڵی و ئامادەكردنی چوار راپۆرتی دەستەكە لەسەر یاسای چاكسازی كرد كە ئێستا ئامادەكاری دەكرێ راپۆرتی پێنجەم پێشكەش بكەن.
سەرۆكی دەستەی دەسپاكی وێڕای بەرزنرخاندنی هەر هاریكارییەكی نێودەوڵەتی بۆ دەستەكە، دووپاتی لەوەیش كردەوە كە هێشتا پێویستە هاوكارى ئەركی رووبەرووبوونەوەی گەندەڵی بكرێ لە كوردستان.
هەروەك ئاماژەی بۆ ئەوە كرد كە لەماوەی چەند ساڵی رابردوو بەهۆی تەنگژەی كۆرۆناوە تا رادەیەكی زۆر كارەكان سستی پێوە دیار بوو، بەڵام لەوماوەیەدا سەتان كەیس رەوانەی دادگاكان كراون.
لای خۆشیانەوە شاندی میوان، وێڕای دووپاتكردنەوە لەسەر هاوكاری و هاوئاهەنگی لەگەڵ دەستەكەدا دووپاتیان لە قورسی ئەركی دەستەی دەسپاكی كردەوە و ئاماژەیان بۆ ئەوە كرد، پێویستە بە هەمووان هاریكاری بكەن.
