ڕۆژی چوارشەم3 /5 / 2023، بەڕێز د.ئەحمەد ئەنوەر سەرۆكی دەستەی دەسپاكی هەرێمی كوردستان بە یاوەری شاندی یاوەری كە پێكهاتبوون لە بەرێوەبەری گشتیی فەرمانگەی یاسایی و بەرێوەبەری گشتیی كارگێری و دارایی و بەڕێوەبەری نووسینگەی سەرۆكی دەستە و بەڕێوەبەری لێکۆڵینەوەی ھەولێر و بەرێوەبەری راگەیاندنی دەستە،لە تەلاری پەرلەمان لەلایەن لیژنەی دەسپاكی پەرلەمانی كوردستان پیشوازیان لێ کرا.
لە كۆبوونەوەكەدا، كە زیاتر لە سێ كاتژمێری خایاند، بەڕێز د.ئەحمەد ئەنوەر وردەكاری تەواوی كاروبارەكانی دەستەی دەسپاكی بۆ لیژنەی دەسپاكی پەرلەمان خستەڕوو، ئاماژەی بەو كێشە و بەربەستانەكرد كە هاتوونەتە بەردەم كارەكانی دەستە.
سەرۆكی دەستەی دەسپاكی هەرێمی كوردستان لە قسەكانیدا باسی لەوە كرد كە دەستەكە لە ئێستەدا كار لەسەر جێبەجێكردنی ستراتیجی رووبەڕووبوونەوەی گەندەڵی دەكات و لەم مانگەدا راپۆرتێك لەبارەی چۆنییەتی جێبەجێكردنی دەخەنە ڕوو.
هەروەها دووپاتی كردەوە كە دەستەی دەسپاكی چۆن دامەزراوە ئێستەیش بە هەمان تواناوە كاردەكات پێشڤەچوونی زۆریش لە كارەكاندا هەیە. سەرۆكی دەستەی دەسپاكی گوتی، پێویستە پێوەندییەكانی دەستەی دەسپاكی دامەزراوەیی بێت، چونكە ئەوەی دەمێنێتەوە دامەزراوەكەیە نەك هیچ كەسێكی تر.
بەڕێز د.ئەحمەد ئەنوەر بە راشكاوانە وەڵامی هەموو ئەندامانی لیژنەی دایەوە كە كۆمەڵێك پرسیاریان ئامادە كردبوو. هەروەها سەرنجی خستە سەر ئەوەی كە جگە لە باڵەخانە و پێویستییەكانی تری بەڕێوەبردن هێشتا دەستەی دەسپاكی كێشەی لێكۆڵەری هەیە و لە زۆربەی ناوچەكانی كوردستانیش سەرباری كارەكانی خۆیان لێكۆڵەر كاری دەسپاكی دەكات.
بەڕێز سەرۆکی دەستە، لەبارەی ماوەی پۆستەکەی گوتی، لە دوو جار زیاتر بە نووسراوی فەرمی سەرۆکایەتی پەرلەمانمان ئاگادار کردووەتەوە کە ئەو پرسە یەکلا بکەنەوە لەڕووی یاساییەوە.
دواتر لەلایەن بەڕێز بەڵێن ئیسماعیل سەرۆكی لیژنەی دەسپاكی لە پەرلەمانی كوردستان، سەرباری بەخێرهاتنی شاندی دەسپاکی باسی لەوە كرد، كە پێویستە هەماهەنگی تەواو هەبێت و لەگەڵ دامەزراوەكانی تریش لەسەر ئەركی رووبەڕووبوونەوەی گەندەڵی قسە بكرێ.
لە كۆتایی كۆبوونەوەكەیشدا هەردوولا هاوڕابوون كە پێكەوە هاوئاهەنگی بكەن و سەرۆكی دەستەی دەسپاكیش دووپاتی كردەوە دەرگای دەستەكەی بۆ هەر پرسیارێك كراوەیە.
