دەستەی دەسپاکی و داواکاری گشتی و ڕیکخراوی undp کۆبوونەوەیەکیان دەربارەی پرۆژەی دادپەروەری ژینگەیی لە هەرێمی کوردستان ئەنجام دا .
ڕۆژی سێشەممە 2023/6/6 بە ئامادەبوونی بەڕێز د.احمد انور سەرۆکی دەستەی دەسپاکی و دادوەر کاوە فەتحی سەرۆکی داواکاری گشتی و د.عدنان عبداللە بەڕێوەبەری گشتی فەرمانگەی خۆپاراستن و شەفافیەت و هاژە عمر بەرێوەبەری نوسینگەی سەرۆکی دەستە و سوسن محمد امین بەڕێوەبەری ئەکادیمیای دەسپاکی و دارەوان نوالدین بەرپرسی بەشی پەیوەندی لەگەڵ ڕێکخراوە ناحکومیەکان لەگەڵ شاندێکی ڕێکخراوی پڕۆگرامی پەرەپێدانی نەتەوە یەکگرتووەکان دەربارەی پڕۆژەی دادپەروەری ژینگەیی لە شاری هەولێر کۆبوونەوەیەکیان ئەنجام دا.
د.احمد انور سەرۆکی دەستەی دەسپاکی باسی لە گرنگی سەروەری یاسا لە هەرێمی کوردستان کرد کە دەبێتەوە هەوێنی کەمکردنەوەی گەندەڵی لە هەموو بوارەکان لە نێویشیان کاریگەری دەبێت لەسەر چاکسازی ژینگەیی ، هەروەک دەستخۆشی لە ڕیکخراوی undp کرد لە هەماهەنگی بەردەوامیان لەگەڵ دەستەی دەسپاکی .
سەرۆکی دەستە گوتی گەندەڵی لە عێراق لە قۆناغێکی مەترسیدار دایە بەو پێیەی وڵاتێکە خاوەن داهاتێکی خەیاڵیە بەڵام ژینگە و خزمەتگوزاریەکانی لە دۆخێکی ناهەمواردا دایە.
لە لایەن خۆیانەوەش لە undp هەریەک لە بەڕێزان رۆمانا شوایغر بەڕێوەبەری پرۆگرامی سەروەری یاسا و عەمار التائی بەڕێوەبەری پڕۆژەی چاکسازی لە کەرتی ئاسایش و حمزە شریف ڕاوێژکاری پێشکەوتوو ، هەروەها نایۆمی ئودیبرت پسپۆر لە مافی مرۆڤ و ئانتجی کرافت پسپۆری پێشکەوتوو لە بواری سەروەری یاسا و عەدالەت لە نیۆورک و ئەنیسە والجی پسپۆر لە بوارری سەروەری ئاسایش و یاسا و ستیڤن گیتونگا پسپۆر لە بواری ووزە و ژینگە ، بەشداربوون لە کۆبوونەوەکە ، بڕیاریشە هاوشێوەی دەستەی دەسپاکی و داواکاری گشتی ئەو شارەزایانەی undp کۆبونەوە لەگەڵ ژمارەیەک دامەزراوەی دیکە پەیوەندار بە پاراستنی ژینگە ئەنجام بدەن.
