سەرۆكی دەستەی دەسپاكی لە هەرێمی كوردستان ڕای دەگەیەنێت، لە ساڵی 2020 بەردەوام چاودێری كەیسەكان كراوە و زۆرترین كەیس کە ئاراستەی دادگا كراوە، لە سنووری پارێزگای دهۆك بووە.
ئەمڕۆ چوارشەممه نۆی كانوونی یەكەم، د.ئەحمەد ئەنوەر سەرۆكی دەستەی دەسپاكی لە هەرێمی كوردستان لە كۆنگرەیەكی ڕۆژنامەوانیدا ڕای گەیاند، لە هەرێمی كوردستان بەرەنگاربوونەوەی گەندەڵی بەردەوامیی هەیە و كۆی گشتی كەیسەكانی گەندەڵی 102 كەیس دراونەتە دادگای تاوان.
زیاتر گوتی، ئەمساڵ 68 هەواڵدەری هەبووە لەلایەن هاووڵاتییانەوە و 168 داوای سزایش هەبووە و ڕێژەكەش بەهۆی كەمبوونەوەی دەوام كەمی كردووە، 85 كەیسیش ئاراستەی دادگاكان كراون و ئەمساڵ 26 كەس سزا دراون و 158 كەیس لە قۆناغی دادگاییدان.
باسی لەوەش كرد، 27 كەیس لە هەولێر ئاراستەی دادگای تاوان كراون و لە سلێمانی 30 كەیس و لە دهۆك 45 كەیس ئاراستەی دادگای تاوان كراون و 56 كەیسیش ئاراستە دادگای كەتن كراوە.
ڕوونی كردەوە، كەیس هەیە بەڕێوەبەری گشتی تێدا بووە و سزاش دراوە، پێنج بەڕێوەبەری ئاسایی و یەك بەڕێوەبەری پێشكەوتوو و 14 فەرمانبەر و یەك پۆلیس و چەند كەیسێكی تریش هەیە ئاشكرا بووە و سەلمێنراوە.
