بە ئامادەبوونی مەسروور بارزانی سەرۆكی حكوومەتی هەرێمی كوردستان ، ڕێورەسمی ڕاگەیاندنی یەكەمین ڕاپۆرتی ستراتیژی ڕووبەڕووبوونەوەی گەندەڵی لە كەرتی گشتیی كە لەلایەن دەستەی دەسپاكی هەرێمی كوردستان ئامادەكراوە بەڕێوەچوو.
لە ڕێورەسمەكەدا كە د.ئەحمەد ئەنوەر سەرۆكی دەستەی دەسپاكی هەرێمی كوردستان و حەیدەر حەنوون سەرۆكی دەستەی نەزاهەی عێراق و ژمارەیەك لە باڵیۆز و دیپلوماتكاران و نوێنەری نەتەوە یەكگرتووەكان ئامادەی بوون، سەرۆكی حكومەت گوتارێكی پێشكەش كرد و تێیدا ئاماژەی دا كە بەشێكی زۆری ئەو داواكاری و ڕاسپاردانەی لەم ڕاپۆرتەدا بۆ بەرەنگاربوونەوەی گەندەڵی ئاماژەیان پێدراوە ، كابینەی نۆیەمی حكومەتی هەرێمی كوردستان هەر لەسەرەتای دەستبەكاربوونییەوە، كاری لە سەر كردوون و پلان و كارنامەی بۆ جێبەجێكردنیان داناوە.
ئەمەش دەقی گوتاری سەرۆكی حكومەتی هەرێمی كوردستانە :
بە ناوی خوای گەورە و میهرەبان
بەڕێزان، بەیانیتان باش، زۆر بەخێر بێن
بەخێرهاتنێكی تایبەتی سەرۆكی ئەنجوومەنی دادوەری لە هەرێمی كوردستان دەكەم، هەروەها بەخێرهاتنێكی گەرمی مێوانانی بەڕێز لە بەغدا، سەرۆكی دەستەی دەسپاكی لە حكوومەتی فیدڕاڵ، هەروەها جێگری سەرۆكی چاودێریی دارایی لە حكوومەتی فیدڕاڵ دەكەم، بەخێرهاتنی هەموو ئەو بەڕێزانەی چ لە كوردستان و چ لە دەرەوەی كوردستان هاتوون، هەروەها بەخێرهاتنی بەڕێز باڵوێزی یەكێتیی ئەورووپاش دەكەم. زۆر زۆر بەخێر بێن،
زۆر خۆشحاڵم كە لەم بۆنەیە لەگەڵ ئێوە بەشدارم.
دەستخۆشی لە دەستەی دەسپاكی هەرێمی كوردستان دەكەم بۆ ئامادەكردنی ئەم ڕاپۆرتە لەبارەی جێبەجێكردنی ستراتیژی ڕووبەڕووبوونەوەی گەندەڵی لە دامەزراوە فەرمییەكانی هەرێمی كوردستان.
بێگومان ڕووبەڕووبوونەوەی گەندەڵی و سنووردانان بۆ بەهەدەردانی سامانی گشتیی ، بەشێكی گرنگی كارنامەی كابینەی نۆیەمی حكومەتی هەرێمی كوردستان بووە . بۆیە كاری جیددیمان كردووە و ڕێكاری پێویستمان گرتەبەر لە پێناو پەرەپێدانی شەفافیەت و ڕووبەڕوبونەوەی گەندەڵی. لەم ڕووەوە هەماهەنگیی و پەیوەندییەكی باشمان لە گەڵ دەستەی دەسپاكی هەرێمی كوردستان وەك دامەزراوەیەكی سەربەخۆ هەیە.
ئەم ڕاپۆرتەش بە هاوكاری و هەماهەنگیی تەواو لەگەڵ حكومەتی هەرێمی كوردستان ئامادە كراوە و لە مانگی ئەیلوولی ساڵی 2021، ئەنجومەنی وەزیران ستراتیژی ڕووبەڕووبوونەوەی گەندەڵی پەسەند كرد و هەڵوێستی خۆی دووپات كردەوە لە بەردەوامبوون لە ڕێكارەكانی پەرەپێدانی شەفافیەت و لێپرسینەوە و ڕووبەڕوبونەوەی گەندەڵی و لە هەمان كاتدا وەزارەت و لایەنە پەیوەندیدارەكانیش ڕاسپێردران بۆ بەدوادچوونی جێبەجێكردنی ڕاسپاردە و پێشنیارەكانی ئەم ڕاپۆرتە كە لەمانگی سێی ئەمساڵدا، لە كۆبوونەوەی ئەنجومەنی وەزیرانەوە لە لایەن بەڕێز سەرۆكی دەستەی دەسپاكییەوە خرایە ڕوو.
جێی خۆشحاڵییە كە بەشێكی زۆری ئەو داواكاری و ڕاسپاردانەی لەم ڕاپۆرتەدا بۆ بەرەنگاربوونەوەی گەندەڵی ئاماژەیان پێدراوە، كابینەی نۆیەمی حكومەتی هەرێمی كوردستان هەر لەسەرەتای دەستبەكاربوونییەوە، كاری لە سەر كردوون و پلان و كارنامەی بۆ جێبەجێكردنیان داناوە، لەوانە:
- بەدیجیتەڵكردنی كاروبارەكانی حكومەت و بنیاتنانی ژێرخانێكی بەهێزی دیجیتاڵی و هەنگاونان بەرەو حكومەتی ئەلیكترۆنی.
پرۆسەی بەدیجیتاڵكردنی خزمەتگوزارییەكان و كاروبارەكانی حكومەت بەردەوامە و بەشێكی گرنگە لە چاكسازییەكانی حكومەت كە بێگومان ڕۆڵێكی كاریگەر دەبینێت لە برەودان بە ڕوونی و شەفافیەت و نەهێشتنی بیرۆكراسی و سنووردانان بۆ گەندەڵی و بەهەدەردانی سامانی گشتی.
تەوەرێكی دیكەی كاركردنمان بە ئاراستەی ڕووبەڕووبوونەوەی گەندەڵی، * چاكسازیكردنە لە سیستەمی بانكی و بەستنەوەی دامەزاراوەكانی حكومەت و كەرتی تایبەت بە سیستەمێكی پێشكەوتوو و هاوچەرخی بانكی.
هەبوونی سیستەمێكی پێشكەوتوو و چالاكی بانكی، جگە لەوەی یەكێكە لە پێداویستییە سەرەكییەكانی ژیانی ڕۆژانەی خەڵك. - فاكتەرێكی گرنگی پەرەپێدانی ئابوورییە و ژینگەیەكی لەباریشە بۆ گەشەی ئابووری و بازرگانی و یارمەتیدەریشە بۆ كەمكردنەوە و سنوورداركردنی گەندەڵی.
هەروەها حكومەتی هەرێمی كوردستان، لە چوارچێوەی بەرنامە چاكسازییەكانی بۆ پەرەپێدانی شەفافیەت و دادپەروەری و ڕێگەگرتن لە بەفیڕۆدانی سامانی گشتی، كاری لەسەر هەمواركردنەوە و پێشكەشكردنی چەند پڕۆژە یاسایەكیش كردووە كە دیارترینیان یاسای چاكسازی لە مووچە و دەرماڵە و بەخشین و ئیمتیازاتەكان و خانەنشینی بووە لە هەرێمی كوردستان كە لە ساڵی 2020 ڕەوانەی پەرلەمانی كوردستان كرا و پەسەند كرا.
هەروەها لە چەند ساڵی ڕابردوو، لێكۆڵینەوە و لێپێچینەوە لە چەندین كەیسی تایبەت بە گەندەڵیش كراون و ڕەوانەی دادگاكانی هەرێمی كوردستان كراون.
ئامادەبووانی بەڕێز :
ئێمە خواست و ئیرادەیەكی بەهێزمان بۆ ڕووبەڕووبوونەوە و بەرەنگاربوونەوەی گەندەڵی هەیە، بەڵام ئەمە تەنیا ئەركی حكوومەت و دادگاكان نییە، بەڵكوو پێویستی بە هەماهەنگیی و هاریكاری و پشتیوانیی گشت هاووڵاتییان و هەموو چین و توێژەكانی كۆمەڵگە و زانكۆ و دامەزراوەكانی پەروەردە و مامۆستایانی ئایینی و دەزگاكانی ڕاگەیاندن هەیە كە دەتوانن ڕۆڵێكی گرنگ و كاریگەر لە هوشیاركردنەوەی كۆمەڵگە و ڕوونكردنەوەی مەترسییەكانی گەندەڵی بگێڕن.
لە هەمان كاتدا پێویستە كار لەسەر پەرەپێدان و بڵاوكردنەوەی كولتووری دەسپاكی و ڕاستگۆیی و دڵسۆزیی بكەین.
هەرچەندە بەشێك لە گرفتەكانی ڕووبەڕووبوونەوەی گەندەڵی و بەرنامەی چاكسازی، دەست تێوەردان و ڕۆڵی لایەنە سیاسییەكان بووە كە نەك هاوكار نەبوون، بەڵكوو هەندێك لایەن دژایەتی سیستەماتیكی هەوڵەكانی حكومەتەیان كردووە.
بەڵام من لێرەدا هاووڵاتییانی خۆشەویستی كوردستان دڵنیا دەكەمەوە، كە سەرەڕای هەموو كێشە و ئاستەنگ و قەیرانەكان، ئێمە بە گوڕ و تین و ئیرادەیەكی زۆر بەهێزەوە، بەردەوام دەبین لە سەر درێژەدان بە كارنامەی چاكسازی و بەرەنگاربوونەوەی گەندەڵی و نەهێشتن و ڕێگریكردن لە بەهەدەردانی سامانی گشتی.
جارێكی دیكەش دەستخۆشی لە دەستەی دەسپاكی دەكەم بۆ ئامادەكردنی ئەم ڕاپۆرتە و هەموو پشتیوانییەكی حكومەتی هەرێمی كوردستانیان بۆ دووپات دەكەمەوە لە پێناو سنوورداركردن و بنبڕكردنی پەتای كوشندەی گەندەڵی لە هەرێمی كوردستان .
هەر شاد و سەركەوتوو بن.
